Lost in Thoughts

The only reason people lost in thoughts is because its unfamiliar territory.

- Paul Fix

ഞാൻ ഈ ഫോട്ടോ പകർത്തുന്നത് ഏകദേശം ഒരു വർഷം മുമ്പ് ആണ്. ഇദ്ദേഹം ആരാണോ എന്താണെന്നോ എനിക്ക് അറിഞ്ഞു കൂടാ. പക്ഷേ, അയാൾ എവിടെയോ ഒറ്റപ്പെട്ടു പോയിരിക്കുന്നു. ചിന്തകളിൽ മുഴുകി ഇരിക്കുകയാണ് അയാൾ. ചിന്തകളിൽ നിന്ന് സ്വപ്നങ്ങളിലേക്ക് അയാൾ പോലും അറിയാതെ വഴുതി പോകുന്നു. സ്വപ്നങ്ങളിലേക്ക് സഞ്ചരിക്കുകയാണ് അയാൾ. ആ വീഥിയിൽ എവിടെയോ അയാൾ ഒറ്റപ്പെടുന്നു.

നാമെല്ലാം നമ്മുടെ സ്വപ്നങ്ങളിൽ സഞ്ചരിക്കുമ്പോൾ എവിടെയോ ഒറ്റപ്പെട്ട അവസ്ഥയാണ്. സ്വപ്നങ്ങൾ പൂ വിരിയുന്നത് ചിന്തകളിൽ മുഴുകി ഇരിക്കുമ്പോൾ ആണ്. അപ്പൊൾ നമ്മൾ നമ്മുടെ പരിസരം മറക്കുന്നു, നാം ആയിരിക്കുന്ന അവസ്ഥ മറക്കുന്നു. ഏതോ ലോകത്തേക്ക് ആഴ്ന്നു ഇറങ്ങി പോകുന്നു. സ്വപ്നങ്ങളിൽ ജീവിക്കാൻ ആണ് പലർക്കും ഇഷ്ടം. അവിടെ നമ്മൾ തനിയെ ആണ്. നമ്മൾ ആഗ്രഹിക്കുന്നതും, നമ്മൾ തുറന്നു സംസാരിക്കുന്നതും അവിടെയാണ്.

വീടും നാടും ഉപേക്ഷിച്ച് മറ്റൊരു നാട്ടിൽ നിലനിൽപിനായി ജീവിക്കുമ്പോൾ സ്വപ്നങ്ങളും ചിന്തകളും ആണ് നമ്മളെ പിടിച്ചു നിർത്തുന്നത്. യാത്ര ചെയ്യുമ്പോഴും, വഴി അരികിൽ കാത്തു നിൽക്കുമ്പോൾ എല്ലാം നമ്മൾ ആ സ്വപ്നത്തില് ആയിരിക്കും. നമ്മുടെ ഓർമകളിലേക്ക്. ഓർമകൾ ഇപ്പോഴും മധുരം ഉള്ളവയാണ്. ചില ഓർമകൾ നമ്മുടെ മിഴികൾ നനക്കും. എന്നാല് ചിലത് നമ്മുടെ ചുണ്ടുകളിൽ പുഞ്ചിരി വിരിയികും. അവ എല്ലാം നമ്മൾ ഓർക്കാൻ ആഗ്രഹിക്കുന്നത് തന്നെ ആണ്.

ഒരിക്കൽ ഞാൻ ട്രെയിൻ കാത്തു റയിൽവേ സ്റ്റേഷൻ പ്ലാറ്റ്ഫോമിൽ ഇരിക്കുകയായിരുന്നു. ട്രെയിൻ ഒരു മണിക്കൂർ ലേറ്റ് ആണ്. ഞാൻ ഇരികുന്നിടതു നിന്ന് കുറച്ചു അകന്നു ഒരു അച്ഛനെയും മകളെയും കണ്ടു. ആ മകൾക്ക് ഏകദേശം ഒരു 4 വയസ്സ് പ്രായം കാണുമായിരിക്കും. അവള് ചുറ്റും ഉള്ളത് വീക്ഷിക്കുന്നു. വഴി അരികിൽ നിന്ന് പ്ലാസ്റ്റിക് കുപ്പികൾ സ്വരൂപിക്കുന്ന വൃദ്ധനേയും, ചായ വിൽക്കാൻ നടക്കുന്ന ചെറുപ്പക്കാരനും, അമ്മയുമായി കുറുമ്പ് കാണിക്കുന്ന കൊച്ചു ബാലനേയും എല്ലാം അവള് സൂക്ഷിച്ചു വീക്ഷിക്കുന്നു. അവൾക്ക് എല്ലാം കൗതുകം ആയിരുന്നു. ആ കൊച്ചു പെൺകുട്ടിക്ക് ഉണ്ടാകുന്ന അതെ കൗതുകം നമ്മുക്കും ഉണ്ട്. ബസ്സിൽ യാത്ര ചെയ്യുമ്പോൾ, ഒരു വിൻഡോ സീറ്റ് കിട്ടാനായി നമ്മൾ ആഗ്രഹിക്കാറുണ്ട്. കുറച്ചു ദൂര യാത്ര ആണേൽ അത് ആവശ്യകരം ആണ്. ആ യാത്രയിൽ നമ്മൾ ചുറ്റും ഉള്ളത് എല്ലാം വീക്ഷിക്കുന്നു. അവിടെ ചിന്തകൾ ഉണരുന്നു. ആ ചിന്തകളിൽ നിന്ന് നമ്മൾ സ്വപ്നങ്ങളിലേക്ക് വഴുതി പോകുന്നു. ആരോരും അറിയാതെ ആരാലും പിന്തുടരാൻ സാധിക്കാത്ത അത്രേം ആഴത്തിലേക്ക്, നമ്മൾ ആഴ്ന്ന് ഇറങ്ങുന്നു. അവിടെ നമ്മൾ ഈ ഭൂമിയുടെ അന്തരീക്ഷത്തിൽ നിന്ന് ഒറ്റപ്പെടുന്നു. ചിന്തകളിൽ ഒറ്റപ്പെടുന്നു ! Lost in thoughts !